105-åring gir ut bok

Kaptein Nils Severin Økland er Bergens eldste mann på 105 år og debuterer som forfattar. I boka «Aldri gi opp», fortel han frå sitt innhaldsrike liv, frå oppveksten på Eikeland i Sveio, om då han rømte til Shetland under andre verdskrig og tenestegjorde som skyttar i Handelsflåten.

I krigsåra hadde Nils Severin 50 turar i konvoi mellom USA og Europa. For innsatsen er han tildelt tre krigsmedaljar. Hans opplevingar i sine seglande år etter krigen som offiser og skipsførar blir også omtalt i boka. Størsteparten av manuset blei skriven på 1980-talet.

Sidan har Økland supplert med tilleggsmemorarer, godt hjelpen av dottera Bjørg Elin Økland, som har sydd det heile saman.

Viktig dokumentasjon

Boka er på 144 sider, og er rikt illustrert med gamle foto. Bilderedigeringsarbeidet er det Einar Vestvik i Sveio kystlag som har stått for. Lagskollega Willy Mjånes har hatt ansvar og redigering av tekstar, og saman med Kjell Værøy sørga for at alle bileta kom på rett plass i boka.

– Boka gir oss viktig historie verdt å ta vare på, seier Mjånes. Han trekkjer særleg fram det som omhandlar krigsåra, både flukten og då Økland blei militær og var med som skyttar ombord på båtar. Økland fortel også om oppvekstsåra sine, mellomkrigstida, han skriv blant anna litt om kor vanskeleg det var. Det kan det jo passa godt i desse korona-tider og bli minna om, påpeikar Mjånes.

Han er imponert over alt 105-åringen har vore med på gjennom eit langt liv.

– Generasjonen som vart fødd før første verdskrig må ha vore laga av noko spesielt. Økland har vore ein tøffing og seig, så tittelen på boka er svært beskrivande.

Spente på mottakinga

Dotter til forfattaren, Bjørg Elin Økland vil retta ei stor takk til Sveio kystlag ved Einar Vestvik, Willy Mjånes og Kristian Wathne for godt samarbeid med bokutgjevnaden.

– Far og eg set stor pris på samarbeidet med kystlaget, og me er svært spente på mottakinga. Me synes det er veldig kjekt at historia til far blir fortalt og utgitt i bokform. Det er eit verdifullt minne for far sine etterkomarar, seier Bjørg Elin Økland.

Ho meiner det er ingen overdrivelse å sei at faren må ha hatt minst ni liv. Ho karakteriserer faren som modig og uredd, ein som viste handlekraft, og som var svært hjelpsam.

– Lærdomen far fekk med seg heimefrå har han hatt god bruk på: «Aldri gi opp». Pågangsmot, god tru, og ein sterk vilje til å arbeida hardt og aldri gi opp har vore drivkrafta hans gjennom heile livet, seier Bjørg Elin.

Dei som ønskjer å kjøpa Økland si bok kan ta kontakt med Willy Mjånes eller Kristian Wathne i Sveio kystlag.