Håpar på anleggsstart like over nyttår

– Det er på høg tid. Talet på ledige graver minkar sterkt, seier leiar i Valestrand og Førde sokneråd, Tor Helge Hardeland.

Han har lenge vore ein pådrivar for utviding av gravplassen. Hardeland meiner dette også er ei sak som folk i Auklandshamn i aukande grad er opptekne av. Lenge har prosessen gått tregt, men dette året har det kome fart i planleggingsarbeidet, konstaterer soknerådsleiaren.

Spent på prisen

Kommunen har sett av midlar på årets budsjett til planleggingsarbeidet som Norconsult nå er i gang med. I økonomiplanen er det sett av 3,5 millionar kroner til utbygging i 2021. Denne løyvinga må innarbeidast i årsbudsjettet for 2021 før arbeidet kan koma i gang.  Budsjettet for neste år blir først vedtatt av kommunestyret i desember.

– Eg opplever stor støtte til dette prosjektet i kommunen og reknar med at pengane kjem, seier kyrkjeverje Ottar Krakk.

Han meiner behovet for fleire graver i Auklandshamn-krinsen er godt kjent både for administrasjon og politikarar, mellom anna gjennom arbeidet med planen for gravplassar fram til 2060 som blei vedteken i fjor. Krakk er meir spent på om 3, 5 millionar kroner er nok til det arbeidet som skal utførast.

– Utvidinga av gravplassen i Førde kosta i overkant av fem millionar. Arealet i Førde er noko større, men det er også spørsmål om kor kostnadskrevjande arbeidet er. På Eikeland blir det ein god del sprenging og deretter påfylling av masse, seier Krakk.

200 nye graver

Gravplassen på Eikeland skal bli om lag dobbelt så stor som i dag. Det skal gi plass til om lag 200 nye graver. Den eksisterande gravplassen blei planlagt for 350 graver, men det skuldast at arealkrava den gongen var mindre enn i dag.  Nå krev kvar grav 4,5 kvadratmeter, før var det nok med 2,88.  Djupna må vera minst 1,6 meter ned til fjell.

– I praksis er det ikkje plass til 350 kistegraver på den eksisterande gravplassen, mellom anna fordi delar av plassen er for grunn, fortel Krakk.

Utvidinga skal skje nordvestover, i eit område som allereie tilhøyrer kommunen. Tilkomsten blir truleg via ein ny veg som skal opparbeidast bak den eksisterande gravplassen, slik at gravfølge slepp å gå ut på fylkesvegen.  Ein mindre del av gravplassen kan bli sett av til urnegraver, men det blir ikkje planlagt plassar for andre religionar. Sveio har sett av eit område til muslimske graver i Førde og meiner dette vil dekka behovet.

I samband med utvidinga av gravplassen skal det også opparbeidast ny parkeringsplass ved Eikeland kapell.  Anleggsperioden er rekna til rundt eitt år. Det kan gå endå litt lenger tid før den nye delen av gravplassen kan takast i bruk. Mellom anna må gravplassen gjennom ein godkjenningsprosess hjå bispedømmerådet etter ferdigstilling, seier Krakk.