Fleire 18-åringar med «null hull»

29 prosent av dei undersøkte 18-åringane i 2019 hadde aldri hatt hol i tennene. Det er 7 prosent fleire enn i 2015. Andelen 18-åringar med «null hull» auka mest i Hedmark denne perioden.

Den offentlege tannhelsetenesta kallar årleg inn barn og unge mellom 3 og 18 år til undersøkingar. I 2019 blei i overkant av 245.000 personar i denne gruppa undersøkt, viser nye tal frå statistikken til tannhelsetenesta. Over 80 prosent av landets 18-åringar blei undersøkt på landsbasis i fjor. Dette er 4 prosent fleire enn i 2015, og tilsvarar nesten 51.000 personar.

Fine smil i Hedmark

Alle fylka hadde ein større andel 18-åringar som aldri har hatt kariesførekomst i 2019 enn dei hadde i 2015. Endringa var størst for Hedmark, der andelen auka med 14 prosent i perioden, frå 29 til 43 prosent. Hedmark har rapportert den største andelen 18-åringar med «null hull» kvart år i perioden frå 2015 til 2019.

Gap mellom regionane

Andelen 18-åringar som blir undersøkt har halde seg temmeleg stabil i perioden frå 2015 til 2019, både for landet samla sett og for kvart enkelt fylke. Men forskjellane mellom fylka er tydelege. I 2019 var det tre fylke som undersøkte over 90 prosent av sine 18-åringar, medan fire fylkeskommunar undersøkte under 70 prosent av personane i denne aldersgruppa.

Stabilt blant borna

Andelen 5- og 12-åringar med «null hull» har ei jamnare utvikling i perioden frå 2015 til 2019 enn 18-åringane, det gjeld både på landsbasis og på fylkesnivå. For dei siste fem åra er landsgjennomsnittet for undersøkte 12-åringar utan hol 60 prosent, og 80 prosent for 5-åringane. I 2019 er det igjen Hedmark som har den høgaste andelen undersøkte som aldri har hatt kariesførekomst, både for 12-åringar (78 prosent) og 5-åringar (86 prosent). Kjelde: SSB