Årets TV-aksjon har fokus på reint hav og reine strender. Å rydda opp på botnen er ein viktig del av det å stoppa tilføring av mikroplast i havet. Mykje av det som er blitt liggande på botnen, løyser seg opp over tid, og kjem dermed inn i næringsrekka og hamnar gjerne til slutt i oss menneske.
I nordre delen av kommunen blei aksjonen for reinare sjø og strender organisert av Slettaa Dykkarklubb og leiar for Sveio Frivilligsentral, Kristianne Uri og hennar høgre hand Guro Røher Eriksen. Bremnes Seashore stilte med båt, Lars Einar Hollund var dykkarleiar og Åge Wee styrte praktisk dykkararbeid.
Mange lag og organisasjonar var med og tok ansvar for innsamling og logistikk og «smurte» maskineriet med kaffe frå Hos Carlos og betasuppe laga av Elin Dalland Hetlesæter i Kvinne og familielaget. Alltid godt med noko varmt i kalde kroppar.
Valestrand Bygdelag var og med og frakta folk til aktuelle strender og henta inn plastsekkar, isopor og anna avfall. Arnt Haugsgjerd køyrde avfall frå Tittelsnes til oppsamlingsstasjonen. I tillegg møtte mange frivillige opp for å gjera ein innsats i det fine haustvêret. Det er utruleg kva ein finn i strendene når ein leitar. Alt frå syklar, isoporkassar og gamle bossdunkar.
Strendene blei rydda frå Grønnevik i Ålfjorden til Tittelsnes og lika til Hauglandsvika. I år fekk ein ikkje nytta det gamle venterommet på ferjekaia, slik at ein måtte organisera annleis. Slettaa dykkarklubb har fleire gangar renska på botnen utanfor ferjekaien like vel fann ein rikeleg med dekk og syklar, mange store traktordekk denne gangen. Det ser ut til at det er utømmeleg på botnen.
Ordførarar Linn Therese Erve smilte frå øyra til øyre etter kvart som det blei fylt opp i containeren. Ho sa at det var fantastisk at samarbeidet i aksjonen fungerte så flott. Når alle dreg lasset, blir lasset stort.
Bror E. Eriksen