At me stiller klokka to gonger årleg kan vera ei ulempe for både barn, dyr og andre som har sine faste rutinar. Men veit du årsaka til at me stiller klokka i mars og oktober?
Kol og insekt
Forklaringa med sommartidsordninga er at nokre land innførte sommartid under første verdskrig for å spara kol som skulle brukast i krigen. Det blir også sagt at George Hudson var den første til å foreslå sommartid – forskaren ønskte seg meir sol å kvelden for å samla insekt, opplyser Nærings- og fiskeridepartementet i ei pressemelding.
Men no er nok ikkje behovet for å spara på kol like stort. Næringsminister Iselin Nybø er den som har ansvar for Justervesenet og nøyaktig tid her i landet, ordninga er kanskje på veg til å avviklast, men det er ikkje bestemt.
Beklagar
– Eg beklagar på det sterkaste at 2020 blir enda ein time lengre, dette har alt vore eit krevjande år for veldig mange, seier ho.
Europakommisjonen la i 2018 fram eit forslag om å avvikla ordninga med å stille klokka fram og tilbake. Status for forslaget er framleis uvisst. Rådet har ikkje vedteke forslaget, og det er ikkje klart om ein vil jobba vidare med forslaget i EU.
Opp til kvart land
– Det er mange som meiner mykje om å stilla klokka. Skulle forslaget bli vedteke i EU, blir det opp til kvart EU-land å bestemma om dei ønskjer å bruka sommar tid eller vintertid som normaltid, seier næringsministeren.