Talet på smitta i nabokommunen vår, Stord, har vore sterkt aukande siste veka. Dette har ført til restriksjonar også i nabokommunar. Mellom anna har Bømlo kommune mellombels besøksforbod på Bømlo bu- og helsesenter, etter at ein elev som hadde praksis her før helga fekk påvist covid-19. Dette har ført til at fleire pasientar og tilsette ved aldersheimen er i karantene.
Oppmoda til å halda seg inne
Både Stord kommune og Bømlo kommune gjekk fredag ut og oppmoda innbyggjarane om å halde seg mest mogeleg heime på fritida, men førebels er det ikkje innført restriksjonar når det gjeld planlagde arrangement.
Stord sjukehus er lokalsjukehus for kommunane i Sunnhordland, som har rundt 50 000 innbyggjarar. Sjukehuset har spesialtilbod innan medisin, kirurgi, røntgen/lab og føde/gynekologi.
Éin innlagt på Stord i helga
Laurdag opplyser Helse Fonna at ein pasient med påvist covid 19-smitte blei innlagt på Stord sjukehus. Pasienten ligg på medisinsk avdeling, og får ikkje intensiv behanding. Pasienten er i aldersgruppa 18-64 år.
Trass i lokale smitteutbrot, har det vore få pasientar innlagde i Helse Fonna i haust. Siste innlagde pasient med covid-19-smitte var tidleg i august på Haugesund sjukehus. Stord sjukehus har ikkje hatt pasientar med koronasmitte sidan starten av april.