No kan Sveio-bedrifter søkja korona-kompensasjon

Sveiobedrifter som er ramma av smitteverntiltak, kan no søkja kompensasjon frå Sveio kommune. Til rådigheit er det 531 651 kroner, som altså skal gå til lokale verksemder.

Kenneth Tollefsen, kommunalsjef for teknisk og næring i Sveio kommune, seier at dei har fått fleire førespurnadar om ordninga, som har vore kjend ei stund.

Ventar søkjarar

– Me ventar at det kjem inn søknadar. Tilbakemeldinga frå dei me har hatt dialog med, er at dei er ramma av situasjonen, og at dette er ei ordning som vil kunne hjelpa verksemda i ei økonomisk krevjande tid, seier Tollefsen.

Målet med tilskotet er å avhjelpa situasjonen for lokale verksemder som er særleg hardt ramma av lokale eller nasjonale smitteverntiltak.

Det er Atheno som skal forvalta midlane på vegne av Sveio kommune. Søknadsfrist er fredag 15. april.

Om ordninga

• Lokale verksemder med forretningsadresse i Sveio, som har falle heilt eller delvis utanfor dei generelle kompenasasjonsordningane kan søka
• Reiseliv-, arrangement- og andre serveringsnæringar vil bli særleg prioriterte
• Destinasjonsselskap og andre fellestiltak for reiselivet kan søka
• Samla tilskot skal som hovudregel ikkje overstiga 50 prosent av kapitalbehovet, og skal aldri overstiga 75 prosent
• Det kan maks søkjast om 100 000 kroner