nyhende
Vil jobba for å få ladekapasiteten i distrikta opp
Statseigde Enova investerer i energi- og klimatiltak, og kan dekka delar av meirkostnaden ved å velgja meir energi- og klimavennlege løysingar. Liv Kari Eskeland (H) og medlem av Stortinget sin energi- og miljøkomite vil ha bensinstasjonane først i køen når nye støtteordningar skal ut.
Stortingsrepresentant Liv Kari Eskeland (H) frå Stord meiner at dei som ønskjer å etablera ladestasjonar må få tilskot for å møta kostnaden kraftselskapa har for å leggja til rette for straum.
– Om bensinstasjonane skal ha ei framtid, må dei bli gjort om til energistasjonar. I første omgang er det Nord-Noreg som blir utbygd, seier ho i møte med Thor Kinn på Haukås sist veke.
I Nord-Noreg har kraftlag gått saman med Enova for å byggja ut eit hurtigladenettverk for elbil, i følgje NRK.
– Me har tatt tak, og det fungerer. Høgre ønskjer ladestasjonar i heile distrikts-Noreg, det må ikkje bli lang tid til. Ladekapasiteten må opp, seier Eskeland, som hadde med seg fleire medlemmer frå Energi- og miljøkomiteen på eit lite stopp på Haukås. Ho meiner det er viktig å bygga ut langs hovudvegnettet først.
– Haukås er ein heilt naturleg stad å tilby ladekapasitet. Skal me få fart på elektrifiseringa av transportnettet, må infrastrukturen, altså ladepunkta ligga på plass. Ein får ikkje folk til å gå over til elbil om ein føler seg usikker på om ein får dekka behov for straum når ein er ute og køyrer, seier Eskeland.
Først på lista
Så langt finst det ikkje tilskotsordningar som er gode nok for til dømes Kinn, som ønskjer å bidra til mindre rekkeviddeangst mellom Bergen og Stavanger.
– Me får støtte frå Enova til ei viss grad, men det blir litt for lite, seier Kinn, som må ut med rundt 1 million kroner for å leggja til rette for straum til ein ladestasjon.
– Det må vera rekningssvarande, seier Eskeland, som ønskjer at bensinstasjonar skal vera først på prioriteringslista i forhold til nye støtteordningar.
Må haldast varmt
Lokalt er Lars Einar Hollund frå Sveio Høgre klokkeklar på at Sveio ikkje må havna i bakleksa når det gjeld utbygging av ladestasjonar.
– Det er viktig å få trafikken på E39 til å stoppa, også i framtida. Regjeringa og Stortinget må løyva pengar til Enova slik at dei kan laga støtteordningar ein kan søka på der det ikkje er kommersielt lønsamt å byggja ladestasjonar, seier Hollund.
