Kombinerer skule med satsing på toppidrett

Sidan 1997 har Haugesund Toppidrettsgymnas (HTG)  vore regionen sitt tilbod til elevar som ønskjer å kombinere satsing på toppidrett med eit studieløp som gir generell eller spesiell studiekompetanse. Først under namnet Holgersens fotballgymnas, og frå 2009 som Haugesund Toppidrettsgymnas. Mange titals håpefulle idrettsutøvarar frå Sveio har nytta seg av tilbodet. I inneverande skuleår er det 12 sveibuar som er elevar ved skulen.  

Glade for lokalt tilbod

Malin Kilnes Nornes (17) er ei av dagens elevar på HTG. Andreklassingen har vakse opp ved Sveio sentrum, og er ein del av den suksessrike troppen til Sveio Drill.  På skulen har ho valt programfaga rettslære og psykologi. I skuletida får ho individuell trening både i drill og ballett, i tillegg til basistrening. Dette kjem i tillegg til treninga ho legg ned heime i Sveio på kveldstid. Ho fortel at ho har to forskjellige sportslege mål, eit individuelt og eit med saman med Sveio drill.

— Individuelt ønskjer eg å bli så god som eg kan, så får eg sjå kva det kan bli til. Saman med Sveio drill håpar eg på gode resultat internasjonalt, til dømes i Europameisterskapen, seier ho.

Andreas Nordentoft Ekrene (17) frå Bjelland går i første klasse på fotball, og kombinerer skulegang med spel for G19-laget til FK Haugesund. Han ser føre seg å velje realfag i andre klasse, og studere til å bli lektor ved siden av toppidrettssatsinga si.

— Målet mitt er å bli så god at eg får sjansen til å spele for FKH i eliteserien, seier den lovande midtstopparen, som starta med fotball heime i Sveio IL.

Linnéa Håvardsholm Sveen (16) frå Søre Våge satsar på friidrett. Førsteklassingen  vurderer å velje psykologi som programfag neste skuleår, og studere sjukepleie eller anna helsefag seinare. Ho er i dag ein del det store friidrettsmiljøet i Haugesund IL. Fram til no er det sprintdistansar ho har hevda seg best i, og i det siste har ho også prøvd seg på hekk.

— Eg vil prøve å bli så god som mogeleg, seier ho.

Alle tre er nøgde med å kunne bu heime i Sveio, samstundes som dei får høve til å kombinere toppidrettssatsing med å sikre seg studiekompetanse.

Toppidrettssjef Leif Sævereid fortel at tilbodet HTG gir er mynta på dei som har kome relativt langt innan idretten sin. Men legg samtidig vekt på at skulen prøver å ha to tankar i hovudet.

– Nokon er gode i sin idrett allereie i 15-16 årsalderen. Andre blir gode når dei blir noko eldre. Vi skal ha eit tilbod til dei også, seier han.

Men han legg vekt på at alle må ha valt sin idrett, og heldt på med den nokre år, for å passe inn i HTG-modellen.

25 forskjellige idrettar

Av 260 elevar er omlag halvparten fotballspelarar. Men det er langt ifrå den einaste idretten. Elevane kan i dag velje mellom 25 forskjellige idrettar, både lagidrettar og individuelle idrettsgreiner. 

— Vi tilpassar opplegget slik at dei får både eit spesialidrettstilbod og eit basistreningstilbod på skulen. Det siste betyr at ein trenar styrke, uthaldenheit og koordinasjon. Både litt generelt, men også spesialisert inn mot dei forskjellige idrettane, fortel Sævereid.

Skulen er ein av fire i landet som har godkjenning frå Olympiatoppen, noko som ifølgje Sævereid sikrar både kompetanse og kvalitet i utdanningstilbodet. Skulen samarbeider med både Olympiatoppen, Antidoping Norge og Sunn idrett-prosjektet til Noregs idrettsforbund, noko som skal sikre kvalitet i alle ledd.

Godkjenninga frå Olympiatoppen betyr at HTG også får toppidrettstilskot frå staten. Det er, saman med skulepengar, med på å sikre finansiering av tilbodet, som mellom anna krev mange lærarar. 

Tilbodet elevane får på HTG skil seg frå tilbodet om idrettslinje, som til dømes dei vidaregåande skulene i Kopervik, Ølen og Stord har.

— HTG sitt tilbod heiter studiespesialisering med toppidrett. Det betyr at eleven kan få både generell og spesiell studiekometanse. I klartekst kan elevane ta alle realfaga hos oss, samstundes som dei tar idretten sin. På idrettslinjene kan dei berre få generell studiekompetanse seier han.

Skilnad frå idrettslinje

På ei idrettslinje er utdanninga retta meir mot treningsleiing, aktivitetslæring og ein del andre typar idrettsfag. 

— Og det er viktig å merke seg at ein ikkje kan hoppe frå idrettslinje til studiespesialisering med toppidrett. Då vil dei mangle nokre fag, så det er to forskjellige tilbod, understrekar han.

Utdanningsløpet på HTG er 3-årig, på lik linje med dei andre vidaregåande skulene. Og skuledagane ved HTG og dei andre skulene er like i form av at dei startar og sluttar samtidig. Men ein kvardag med både trening og undervisning gjer at det ikkje er fritimar mellom fag, slik det er på dei fleste vanlege vidaregåande skulene.

— Der dei andre vidaregåande skulene spreier 30 undervisningstimar i første klasse på fem dagar – som  gir seks timar kvar dag, så blir timeplanen lagt med åtte timar kvar dag hos oss, inkludert trening, forklarer Sævereid.

Måndag, tysdag, torsdag og fredag har dei treningsøkt. Onsdagane har dei obligatorisk kroppsøvingsfag i tillegg. 

— Alle treningsøktene er lagt til formiddagen, fordi dei fleste også trener på kvelden, legg Sævereid til.

Karakteren elevane får i toppdrett tel like mykje som matematikk-karakteren når dei skal søke vidare til høgare utdanning.

Dette er idrettane ved HTG:

Styrkeløft

Badminton

Basis+

Basket

Drill

Fotball

Konkurransedans

Friidrett

Gokart

Handball

Ishockey

Islandshest

Kampsport

Klatring

Orientering

Padling

Rifleskyting

Rytmisk gymnastikk

Sprangriding

Symjing

Teamgym

Triatlon

Vektløfting

Volleyball