Det blir billigare å reise med buss til Haugesund

Mange sveibuar har sett på det som urettferdig at Skyss si takstsone for Sunnhordland ikkje har inkludert bussreise til sitt regionsenter Haugesund.

Som ein konsekvens av at Haugesund er lokalisert like sør for fylkesgrensa, har Vestland fylkeskommune sitt samferdsleselskap Skyss praktisert at passasjerane har måtta betalt for to takstsoner ved passering av fylkesgrensa.

Prinsippet om to takstsonar har fordyra reisa for så vel dagpendlarar mellom Sveio og Haugesund, som for alle ungdommar og andre som bruker fritidstilbod i Haugesund med nesten 35 prosent.

Denne skilnaden var eit av dei tydeligaste argumenta mange hadde for å røyste for å byte fylke frå Vestland til Rogaland under folkerøystinga i Sveio i januar i år. Røystinga gjekk som kjent i favør av å bli verande i Vestland, men det er tydeleg at argumentet vart høyrd.

KrF tok opp saka

Mellom anna har Jarle Jacobsen i Sveio KrF jobba aktivt inn mot sin fylkesrepresentant Trude Brosvik, som sit i utval for samferdsel og mobilitet i Vestland fylke.

I februar-møtet i samferdsleutvalet fekk Brosvik fleirtal for eit forslag som sa at administrasjonen skulle lage ei eiga sak om avvikling av dei nemnde støtte-sonene i heile fylket. Administrasjonen jobba raskt, og på møtet tysdag denne veka fekk utvalet den på bordet.

I framlegget rår fylkesdirektøren til at fylkesutvalet vedtar å avvikle ordninga med støttesoner.

Kostnadane knytt til avvikling av støttesonene er berekna til om lag 0,6 millionar kroner.

Fylkesdirektøren legg opp til at kostnaden vert dekka av budsjettløyvinga til felles sonestruktur for buss i Vestland.

Eit samrøysta utval for samferdsel og mobilitet gjekk inn for fylkesdirektøren til forslag. Saka skal opp til endelig avgjerd i fylkesutvalet i april.

— Eg kan ikkje tru at fylkesutvalet vil stille seg annleis enn me gjorde i utvalet for samferdsel og mobilitet, seier ho.

Det var KrF som fremja saka i utvalet, men ifølgje Trude Brosvik (KrF) har det vore samarbeidd mellom fleire parti om saka. Akkurat kven som har samarbeidd vil ho ikkje gå inn på, utover at vedtaket var samrøysta. Men ho kan for eigen del stadfesta at Jarle Jacobsen i Sveio KrF har minna om hans meining om saka kvar gong dei har møttest.

Nøgd ordførar

Sveio-ordførar Linn Therese Erve (Ap) er glad for det no ser ut til å bli ei utvida takstone rundt fylkesgrensa i sør.

— Eg er veldig nøgd med at fylket har lytta til oss, seier ho.

Erve trur endringa i takstsonane vil gjere det enklare for alle å reise mellom sentra i regionen.

Sone C består av Sveio, Stord, Bømlo og Fitjar, og frå 1. juli truleg også Skyss sine ruter til og frå Haugesund.

— No står det att å få opp frekvensen mellom Haugesund og Sveio, slik at tilbodet på ettermiddags og kveldstid blir betre, seier Erve.

Men her vil ikkje Trude Brosvik Vestland KrF love noko. Ho viser til at spørsmålet om frekvens er tema i mange distriktskommunar i Vestland, og minner om at Sveio faktisk er betre stilt enn en del av andre kommunar i Sveio allereie.

— Eg kan ikkje love noko «quick fix» for Sveio i så måte, seier ho.