Lokal industri kan bli hardt ramma av streik

Blir det ikkje semje mellom Fellesforbundet og Norsk Industri innan fristen ved midnatt natt til fredag, blir rundt 27.600 tilsette i industrien tekne ut i streik. Mange av desse jobbar i bedrifter på Vestlandet.

Les også: Sveio-bedrift kan bli råka av streik

I industrikommunen Stord, som har i underkant av 19.000 innbyggjarar, er det varsla uttak ved 14 bedrifter, og til saman kan 1.390 tilsette bli tekne ut i streik. Det er ved bedriftene Aker Solutions (580), Ventor Energi (204), SEC (198) og Yabimo (166) at flest kan bli tekne ut.

Kommunikasjonssjef Odd Naustdal ved Aker Solutions Stord skriv i ei tekstmelding til NTB at dei følgjer utviklinga og håpar at partane blir samde innan fristen.

– Vi vil ikkje spekulere i utfallet eller kommentere moglege effektar på dette tidspunktet, skriv han.

Stort uttak ved Aibel

I Stavanger kan nær 2.300 industriarbeidarar kan bli tekne ut. Flest blir tekne ut i oljeserviceselskapet Kaefer Energy (405), NSE Industrier (339), Bilfinger Industrier Norge (327) og Aker Solutions (324).

I Haugesund kan til saman nær 1.200 arbeidstakarar gå ut i streik. Blant dei jobbar 444 ved Haugesund Skips and Offshore Service AS og 627 ved oljeservice- og havvindleverandøren Aibel, som er det største uttaket i ei enkeltbedrift.

– Det vi kan seie er at ein streik sjølvsagt vil ramme aktiviteten vår både i Haugesund og på dei anlegga vi jobbar på – til dømes Hammerfest LNG. Vi ønskjer ikkje å gå ytterlegare i detalj om korleis og i kva omfang. Vi respekterer samtidig forhandlingane og håpar at partane når til semje og at det ikkje kjem til streik, seier kommunikasjonsrådgivar Christian Holm Foder i Aibel til NTB.

Tillitsvald for Fellesforbundet ved Aibel i Haugesund, June Heggheim, sa søndag til NTB at ho ventar at resultatet av meklinga vil bli auka kjøpekraft, og at velferdspermisjonar, etter- og vidareutdanning elles er viktige saker.

– Det er mykje som er viktig i år, så eg håpar dei kjem krava våre i møte, for streikeviljen er stor, sa Heggheim.

Mo, Kongsberg og Raufoss

Også andre stader i landet kan bli ramma av ein mogleg streik. I Mo i Rana blir 903 tilsette i 16 bedrifter tekne ut. På Kongsberg har Fellesforbundet varsla uttak av 177 i GKN Aerospace og vel 600 tilsette i andre bedrifter i kommunen.

På Raufoss vil dei ta ut 360 tilsette i forsvarskonsernet Nammo og 315 i bildelprodusenten Benteler Automotive. Til saman i Vestre Toten kommune er det varsla at over 1.400 tilsette fordelte på 17 bedrifter kan bli tekne ut.

Administrerande direktør Vegard Sande i Nammo Raufoss seier til Oppland Arbeiderblad at han håpar partane blir samde.

– Dersom det blir streik og Nammo Raufoss blir teken ut, kan vi måtte stengje ned heile eller deler av produksjonen, seier Sande.

Innspurt

Måndag starta innspurten i industrioppgjeret då partane møttest hos riksmeklar Mats Ruland til tvungen mekling.

Til FriFagbevegelse sa Riksmeklaren at han ikkje har tru på at partane vil bli samde før meklingsfristen.

– Frontfaget er alltid vanskeleg, men i år er det vanskelegare enn det pleier, sa han.

Utfallet av oppgjeret i frontfaget har mykje å seie for lønnsoppgjeret òg i andre bransjar. Tanken med frontfagmodellen er at konkurranseutsett industri forhandlar først og set rammene for dei andre oppgjera.

Lønnsforhandlingane i industrien starta 9. mars. Medan arbeidstakarorganisasjonane krev auka kjøpekraft og har vist til stadig stigande prisar, har Norsk Industri åtvara mot ein lønnsauke som vil gå ut over konkurransekrafta.

Samtidig har Ukraina-krigen og sanksjonane mot Russland ført til prisauke og uvisse. Det tekniske berekningsutvalet (TBU), som legg fram nøkkeltal i forkant av lønnsoppgjera, oppjusterte like før forhandlingane den venta prisveksten til 3,3 prosent.

(©NPK)