nyhende
No kan du gi dine innspel til ny motorveg gjennom Sveio
Frå og med i dag og fram til 20. juni kan du for første gong kome med innspel til kommunedelplanen for ny E39, med firefelts motorveg med 110 km/t fartsgrense gjennom Sveio.
Det melder Statens Vegvesen i ei pressemelding.
Vestavind har tidlegare skrive om planane for det 57 kilometer lange motorvegprosjektet E39 Bokn-Hope, som blir ein del av planane om ny fire felts veg frå Stavanger til Bergen.
No har Samferdselsdepartementet formelt gitt Statens vegvesen i oppdrag å utarbeide kommunedelplan med konsekvensutgreiing for prosjektet, og onsdag var det formelt varsla oppstart for planarbeidet.
Vegvesenet opnar i den samanheng for at alle kan kome med sine synspunkt, innspel eller andre relevant opplysningar.
Høyringsfristen for innspel til planarbeidet er sett til 20. juni i år.
110 kilometer i timen
Vegen blir planlagd for ei fartsgrense på 110 kilometer i timen. Når prosjektet står ferdig, saman med Rogfast og Hordfast, skal det gi ei reisetid mellom dei to største byane på Vestland på berre 1 time og 50 minuttar.
Me snakkar også om det største byggeprosjektet i Sveio kommune gjennom alle tider. Vegen vil bety store naturinngrep, og vil få konsekvensar for fleire hundre grunneigarar i kommunen.
Store naturinngrep
I første omgang har Vegvesenet teikna ein om lag 1,6 kilometer brei korridor gjennom Sveio kommune, og innanfor den er planen å finne alternativ til trasé. Og frå og med onsdag 27. april har alle for første gong mogelegheit til å gi sine innspel til planleggingsarbeidet.
Det gjer ein ved å nytte ein digital portal på prosjektet sin side på nettstaden til Statens Vegvesen, eller via e-post eller brev til Vegvesenet.
— Vi er no i den første fasen av arbeidet med å lage ein kommunedelplan, som vil seie at Statens vegvesen utarbeidar eit planprogram, skriv Vegvesenet i pressemeldinga.
Statleg plan
Planprogrammet gjer greie for formålet med planarbeidet, planprosessen med rammer og premiss for det vidare arbeidet, og dessutan opplegg for medverking. Planprogrammet vil legge føringar for om heile eller delar av strekninga skal verte behandla som statleg plan. Det betyr i så fall at det er Stortinget som gjer endeleg vedtak om traséval.
Forslaget til planprogram skal ut på offentleg høyring hausten 2022 før det blir godkjent av Kommunal- og distriktsdepartementet.
