Vurderer fire straumstøtte-tiltak

Onsdag skreiv Vestavind at Sveio Næringsforum slo alarm på vegner av medlemmer som er i ferd med å bruke opp sine økonomiske reserverer på å handtere tredobla straumrekningar den siste tida.

Konstituert rådmann Ingunn Toft seier at politikarane vil få ei sak til handsaming i november.

Fire tiltak

Administrasjonen har sendt ut på høyring fire forskjellige tiltak til medlemsbedrifter i næringsforumet.

• Tilskot for perioden januar-september 22

• Tilskot til straum i ein akuttsituasjon for å unngå konkurs

• Rettleiing i høve til nasjonal straumstøtteordning

• Straumstøtte ordning for mindre nærbutikkar.

— No er det jo kome på plass ei statleg ordning for nærbutikkane, og ei eventuell kommunal ordning må sjåast i lys av den, presiserer rådmannen.

Kommunen ser føre oss at ei slik støtte skal gjelde for perioden januar til september 2022.

— Den statlege støtta, for dei som kvalifiserer for den, vil gjelde for oktobertil og med desember. Det er på det reine at dei ikkje kan få bode kommunal og statleg støtte, seier ho.

Underskot-vilkår

Kommunen deltok på eit møte med lokalt næringsliv tidlegare i haust, og det er tilbakemeldingar gitt på dette møtet, i direkte samtalar mellom kommunen og i ei spørjeundersøking kommunen har sendt ut til verksemdene som ligg til grunn for alternativa ein ser på.

— Tilskota vil kunne gis som likviditetslån i påvente av årsoppgjer, med eit vilkår om at ein må ha underskot i drifta. Resultata for høyringa vil danne grunnlag for forslag som kjem i saka, opplyser ho.

Rådmannen understrekar at det å gi straumstøtte er eit komplekst tema, som krev grundig førebuing av saka frå kommunen si side, og dette er årsaka til at ein treng tida fram til den politiske møteserien i november for å kunne fremje forslag som tilfredsstillar alle regelverk knytt til det å gi offentleg støtte til private verksemder.