Ventar orkan i kasta fredag

I Sunnhordland kan det komma vindkast på 35–40 meter per sekund (m/s) frå nordvest. Vinden aukar først i sør, varslar meteorologane.

Det oransje farevarselet gjeld frå klokka 14.00 til 19.00 fredag. I Sveio er den kraftigaste vinden venta frå klokka 15.00 og utover ettermiddagen. Grensa for orkan er 33 m/s, og mellom klokka 15.00–18.00 melder Yr.no 34–35 m/s i kasta. Frå klokka 18.00 er kasta venta å gå frå sterk storm til liten storm fram mot midnatt.

Er klare til å aksjonera

— Fest alle lause gjenstandar, unngå ferdsel på utsette stader, berekn ekstra tid til transport og køyring, og vurder om reisa er nødvendig, skriv meteorologane.

Vidare blir det åtvara om at gjenstandar kan bli tekne av vinden eller blåsa over ende, og det er fare for skade på bygningar og infrastruktur.

— Det er viktig at den enkelte sikrar seg og sitt. Sveio kommune har ikkje sett i verk spesielle tiltak, men beredskapsorganisasjonen er klar til å aksjonera om det oppstår situasjonar. Brannvesenet er også budd på at det kan bli akutte oppdrag, seier beredskapskoordinator Bjarne Hetlesæter.

Rammar ferjer, fly og annan transport

Det er venta både kansellerte avgangar for ferjer, fly og annan transport, og vegar og bruer kan bli stengde. Også straumforsyninga kan bli ramma på grunn av tre som knekk. Høge bølgjer kan gi skade på infrastruktur og bygningar i strandsona.

I Agder og delar av Telemark er det venta lokalt svært kraftige vindkast på 25 m/s i indre strøk. På kysten vil det vera vindkast opp mot 40 m/s. Farevarselet gjeld frå klokka 14.00 fredag og til midnatt.

Stormen som kjem, rammar også Danmark. Danskane har gitt han namnet Otto.