Senterpartiet fekk eit samrøystes kommunestyre måndag 12. juni til å løyva 200.000 kroner til ENØK-tiltak i kommunale husvære under saka om revidert budsjett.
Bakgrunnen er ein interpellasjonen «ENØK-tiltak i kommunale husvære» som Senterpartiet leverte i kommunestyret 20. februar. I interpellasjonen blei det spurd om korleis energistatusen er i kommunale husvære i Sveio.
Vanlegvis er det folk frå låginntektsgrupper som bur i kommunale leilegheiter. Dei må ta til takke med den byggtekniske standarden som finns. Men det er leigetakar som betalar straumrekninga om ein i praksis «fyrer for kråka». Sveio ligg blant dei verst stilte kommunane i regionen når det gjeld familiefattigdom.
I ordføraren sitt svar til interpellasjonen står det at Sveio eig 64 utleigeeiningar utanom sjukeheimsplassane. 4 einingar har felles varmepumpeanlegg. 3 einingar har mindre luft til luftvarmepumper. 23 av einingane har varmepumpe i fellesareal, men ikkje i sjølve leilegheita. Elles er standarden på einingane varierande. Nokre kunne fått ein betre ENØK-situasjon ved å isolere, skifte vindauge og installere varmepumpe.
Det er forstemmande at kommunen har sytt for varmepumpe i fellesareal der ein sjølv betalar straumen, men ikkje installert varmepumpe i sjølve leilegheitene der leigetakarane betalar for straumen.
200.000 kroner rekk kan hende til varmepumpe i 10 leilegheiter. Det er ei byrjing for å betre tilhøva til dei som bur i kommunale leilegheiter når vinteren kjem og straumprisen vert høg.
Arne Valen på vegne av Sveio Senterparti