Dette meiner politikarane

Me har stilt dei følgande spørsmål:

– Kva meiner du og ditt parti at Sveio kommune må gjera for å møta utfordringane som den nye alderssamansettinga av befolkninga fører med seg?

Her er svara me har fått:

Olav Østebø Olsen (SV)

– Endringane i demografien er nasjonale og globale, og det er lite me kan gjera lokalt for å påverka utviklinga på mellomlang sikt – altså må me prioritera å tilpassa oss. For å ha tilstrekkeleg kapasitet i helse- og omsorgssektoren, må me halda på kompetansen me har. Då er det vesentleg med gode arbeidsvilkår for dei tilsette og høg grunnbemanning.

– Vidare må me utvikla aldersvenlege bustader nær transport- og tenestetilbod, ei mangelvare i kommunen vår. Og kommunen må halda fram med å støtta lokalt kulturliv og frivilligheit, så me sikrar møteplassar der generasjonane kan trivast i lag.

Asle Georg Halleraker (TvF)

– Dei eldre må ha høve til å skaffa seg bustad nær servicefunksjonar og kulturelle aktivitetar. Her meiner me at private, staten og kommunen må koma på bana med gode finansieringsordningar. Dei eldre må få bu slik at dei lett kan koma i kontakt med kvarandre for slik å motverka einsemd. Universiell utforming av bu- og lokalmiljø slik at dei eldre lett kan koma seg rundt med ein rullestol eller rullator.

– Heimesjukepleien må ha god kompetanse og fungera godt for dei som i all hovudsak er i stand til å bu heime hos seg sjølv i ein tilrettelagt heim med moderne velferdsteknologi. Kommunen må leggja til rette for bustadtomter til barnefamiliar til ein pris som er overkommeleg for dei fleste.

Kjartan Moe Hustvedt (MDG)

– Sveio kommune må sikra at me har, og klarar å halda på, kompetent helsepersonell for å kunne gi eit godt tilbod til alle som treng det, der dei treng det. Gode løns- og arbeidsvilkår vil vera avgjerande.

Sondre Natås Strand (KrF)

– Me må gjera det attraktivt for fleire unge og barnefamiliar å busetja seg i kommunen. KrF ønskjer fleire arbeidsplassar, kor kommunen legg til rette og opnar areal som er lett tilgjengeleg og rimelege alternativ til Årabrot og Heiane. Vidare må me leggja til rette for bustadtomter med god storleik og utsikt nær nabokommunene våre i sør og nord.

Fjord Motorpark må realiserast. Me må også også rusta oss for eldrebølga som er godt i gang. Me må gjera helsetenesta vår til ein attraktiv plass. Samstundes ønskjer me å leggja til rette for at dei eldre kan bu lenger i si bygd, ved etablering av eldretun.

John Kristian Økland (H)

– Tala indikerer ei massiv endring i demografien i Sveio, men dette gjeld også i Noreg totalt sett. Sveio Høgre meiner at kommunen vår har mykje å by på for småbarnsforeldre, men at me fortsatt kan bli betre på å marknadsføra oss. Me meiner at attraktive tomter med varierte kvalitetar, forutsigbar skulestruktur og eit variert og tilgjengeleg fritidstilbod er viktig.

– Me må også finna løysingar for framtidas eldreomsorg. Fleire treng pleie, men det er også mange som vil ynskja sosiale møteplassar. Slike møteplassar er noko av det me jobbar med i prosjektet «Nyskapande aktivitsanlegg» på Vigdartun, og me vil mellom anna også vera positive til etablering av aldersvenlege bustadar i heile kommunen.

Linn Therese Erve (Ap) 

– Sveio Ap meiner me må styrka arbeidet for at fleire kan bu trygt og godt heime. Til dømes med førebyggande helsearbeid for å betra folkehelsa og folks livskvalitet, styrka frivilligheita og vidareutvikla heimetenestene med blant anna tiltak som avlastning i heimen med miljøarbeidar.

– I tillegg vil me jobba for fleire ulike buformer som møter framtidas behov. Samstundes må me arbeida for tilflytting, der me alltid må ha god kvalitet i barnehage, skule, alle helsetilbod og gode møteplassar for alle innbyggarane våre.

Rune Teikari (Frp)

– Me må satsa på dei unge og sørgja for at Sveio er ein attraktiv og spennande kommune å busetja seg i. Sveio må vere førstevalet både for sveibuar og andre haugalendingar som returnerer til Haugalandet etter til dømes studier eller andre opphald utanfor vår region. Sveio Frp er opptekne av at Sveio skal vera ein kommune som gir moglegheit for det gode liv – ut frå eigne preferansar – anten ein vil bu på bygda, ved sjøen eller i sentrum.

– For å sikra dette treng me ein fleksibel kommuneplan. Me har programfesta grunnpillar at vi skal vera ein reell ja-kommune. Me  vil sikra barnhagar  og skular med høg kvalitet og trivsel. Samtidig er me opptekne av å stimulera og legga til rette for frivilligheita for å sikra eit breitt og godt tilbod til både unge og vaksne. Me skal ivareta heile 24-timars-mennesket.

Monica Vandaskog Valen (Sp)

– Førebygging er viktig som til dømes fysisk aktivitet. Sveio har målsetting om at folk skal bu lengst mogleg heime. Utfordringane kan vere manglande tryggleik og einsemd om ein bur åleine. Det er viktig at det er møteplassar for eldre. Sosial kontakt har stor betydning for alle, også dei eldre.

– Det er ikkje sikkert bustaden ein har hatt det meste av livet er best egna når ein blir eldre. Senterpartiet vil leggje til rette for eldrebustader i eit tun med fellesareal utanom eigen leilegheit  der og heimesjukepleien kan ha ein base. Det vil gi tryggleik og redusere einsemda.