Sveio kommune står no overfor eit val som ikkje berre handlar om pengar, men om tryggleiken og framtida vår. Å leggje ned Førde brannstasjon er ikkje berre ein økonomisk avgjerd – det er ei avgjerd som kan koste liv og stoppe framtidig vekst. Dette handlar ikkje berre om tal og statistikk, men om tryggleiken til kvar einaste innbyggjar i kommunen. No er tida inne for å stå saman og sikre at politikarane gjer det rette – ikkje berre for oss, men for kommande generasjonar.

Etter at politiet sitt nærvær i Sveio blei svekka ved at lensmannskontoret i Førde blei nedlagt i den såkalla «nær-politi-reforma» har vårt frivillige brannvesen fått endå større ansvar og utfordringar, særleg ved trafikkulykker. Det er lokalt brannvesen som er først på staden når noko skjer.

Kvifor ta risikoen?

Tenk deg situasjonen: Det er natt, og eit ungt par i Førde opplever at den nyfødde babyen deira sluttar å puste. Eller tenk på Einar, ein eldre mann som bur åleine på Håvardsholm og får hjartestans. Førde brannstasjon kan vere der med hjartestartar innan få minutt, men utan stasjonen vil hjelpa kome minst 20 minutt seinare – kanskje for seint. Ifølgje Norsk Luftambulanse minkar sjansen for overleving med 10 prosent for kvart minutt utan livreddande tiltak. Skal vi akseptere at livet til naboen, barnet eller faren vår heng i ein slik tynn tråd?

Ein kritisk periode

Med den planlagde utbygginga av E39 Bokn–Bømlafjorden, og andre store prosjekt som Rogfast, og Hordfast vil trafikkmengda gjennom Sveio auke betrakteleg. Det blir også mykje meir lang- og tungtransport. E39-prosjektet skal redusere reisetida mellom Stavanger og Bergen til under to timar, noko som vil føre til langt større trafikkvolum gjennom kritiske områder som Bømlafjordtunnelen. Med denne veksten i trafikkmengd aukar også risikoen for brannar, ulukker og utrykkingar, noko som stiller endå høgare krav til rask og effektiv brannberedskap.  Vi veit frå hendingar som brannen i Gudvangen-tunnelen i 2013 kor farlege  tunnelar kan vere ved brann eller ulukker. Over 60 personar måtte evakuerast, fleire fekk alvorlege røykskadar, og det er berre flaks at ingen liv gjekk tapt.

Å kutte beredskapen i ein periode med auka trafikk og utbygging er direkte uforsvarleg. Sveio og regionen rundt må vere klare for å handtere både noverande og framtidig trafikk – og det kan vi ikkje gjere utan Førde brannstasjon.

Beredskap 

Kva skjer dersom ein liknande brann oppstår i Bømlafjordtunnelen, og Førde brannstasjon ikkje er der for å svare på alarmen innan 10–12 minuttar? Sveio brannstasjon ligg for langt unna til å kunne respondere raskt nok, og det vil ta nærmare ein halvtime før hjelpa kjem. Dette kan bli ei katastrofe for dei som er fanga i tunnelen. Vil brannmannskapet frå Stord kunne nå dei som er fanga på Sveio sida? Eller kva skjer om det brenn på Tittelsnes? Skal vi verkeleg gamble med at brannvesenet frå Stord, som må køyre gjennom tunnelen, kjem fram i tide?

Fakta må vere riktig 

Rapporten frå Einang Safety Consult AS påstår at Sveio kan klare seg utan Førde brannstasjon, men denne rapporten er full av faktafeil, noko både brannmannskap og ekspertar har påpeikt. Dette er ikkje berre ein teknisk diskusjon – dette handlar om liv og tryggleik. Skal vi verkeleg basere framtida vår på ein rapport som ikkje er grundig nok?

Svekka beredskap – auka risiko

Dersom Førde brannstasjon blir lagt ned, vil ansvaret for store delar av nordre Sveio falle på Stord brannvesen. Dette vil ikkje berre svekke beredskapen i Sveio, men også i Stord, fordi kvar gong Stord må rykke ut til Sveio, vil deira evne til å takle krisesituasjonar heime bli svekka. Skal vi verkeleg utsette både Sveio og Stord for auka risiko ved å kutte ned på ein så viktig ressurs?

Tryggleik og bustadutvikling

Tryggleik er ikkje berre viktig for å handtere ulukker – det er også eit av dei viktigaste kriteria folk ser på når dei vel kvar dei vil bu. Med utbetringa av infrastruktur langs E39, vil Førde vere godt posisjonert til å vekse og utvikle seg. Men utan ein brannstasjon vil området miste både attraktivitet og tryggleik. Ein ny brannstasjon i Førde vil ikkje berre betre beredskapen – det vil vere ei langsiktig investering i framtida til lokalsamfunnet vårt. Folk ønskjer å busetje seg i område der det er god beredskap og naudetatar i nærleiken. Å leggje ned brannstasjonen sender feil signal til barnefamiliar og bedrifter som ønskjer å etablere seg her. Ved å investere i ein brannstasjon, investerer vi i tryggleik, stabilitet og vekst for framtida.

HMS og berekraft 

Ein brannstasjon må ikkje berre sikre tryggleiken til innbyggjarane, men også sørge for gode arbeidsvilkår for brannmannskapet. Arbeidstilsynet har pålagt kommunen å byggje ein ny stasjon innan 2026 for å oppfylle HMS-krav til reint og ureint arbeid. Dersom kommunen ikkje oppfyller desse krava, vil det resultere i store dagbøter og enda større økonomiske belastningar for kommunen. Det er mogleg å byggje ein ny stasjon på ein økonomisk forsvarleg måte, slik erfaringane frå Stord har vist. Dei klarte å byggje nytt utan å sprenge budsjettet ved å bruke nøkterne, men funksjonelle løysingar. Sveio kan følgje dette dømet og finne fornuftige alternativ når det gjeld plassering – kanskje til og med tilpasse eksisterande bygg eller byggje på allereie etablerte industriområde.

Politikarane sitt ansvar

Til våre valde representantar: De har eit ansvar. Når de tar ei avgjerd som set tryggleiken til innbyggjarane i fare, må de også ta ansvaret for konsekvensane. Kva vil de svare når folk spør kvifor brannvesenet ikkje kom raskt nok fram? Kva vil de seie til familiane som mistar heimane sine – eller endå verre – sine kjære? Dette er ikkje eit spørsmål om sparing. Det er eit spørsmål om liv og død. Vi krev at de tek ansvar og beheld Førde brannstasjon – for oss, for våre naboar, og for framtidige generasjonar.

Tor Inge Flåten,

leiar i Førde Bygdalag