Arild Steinsland blir prost

– Eg reknar med å takka ja til tilbodet, seier Steinsland, som ser for seg å starta i den nye stillinga ved årsskiftet.

Svarfrist

Det var måndag bispedømmerådet i Bjørgvin vedtok å tilby stillinga til Steinsland. Dette stadfestar seniorrådgjevar for kommunikasjon ved bispedømmet sitt kontor, Jens Z. Meyer, overfor Vestavind. Han opplyser samstundes at Steinsland har åtte dagar på seg for å svara om han tar imot tilbodet.

Det var i alt seks søkjarar til stillinga som prost i Sunnhordland etter Svein Arne Theodorsen.

Vil bu i Førde

– Prost er ei fulltids stilling og arbeidsstaden blir Stord, seier Steinsland.

Han vil likevel halda fram med å bu i Førde, og gjerne i prestebustaden.

Sidan Steinsland blir prost frå årsskiftet, må den ledige stillinga som sokneprest i Valestrand og Førde lysast ut snarast. Planen er at det i alle fall skal skje før jul, seier Steinsland.

Eirik Aadland Tappel (49), som er tilsett som sokneprest i Sveio, tek til i si nye stilling 19. desember. Dermed rekk han så vidt å koma på plass før Steinsland sluttar av, og Sveio-kyrkja risikerer dermed ikkje å bli utan fast prest i ein periode.