nyhende
Opnar tyrkisk restaurant i Sveio
Ömer Sariaslan, som driv restauranten Ottoman i Haugesund, reknar med å opna ny restaurant og bar i Sveio sentrum innan to-tre veker.
Kommunestyret i Sveio vedtok måndag å gi den nye restauranten løyve til skjenking av alkohol i gruppene 1-3. Det blir løyve til servering både innandørs og utandørs. Tyrkisk mat vil stå på menyen.
Midt i leio
Ottoman AS skal leiga lokale i Sveiogata 74, der det tidlegare har vore ulike serveringsverksemder. Den nye restauranten skal få namnet Midt i leio restaurant og bar, men blir ein del av selskapet Ottoman AS, forklarar Sariaslan til Vestavind. Han seier lokala er så godt som ferdig oppussa. Eigentleg var det meininga å opna denne veka, men dette er blitt utsett på grunn av sjukedom.
Den nye serveringsstaden vil vera open alle dagar unntatt måndag. Det vil vera seine opningstider laurdag og søndag.
Ottoman AS er registrert med forretningsadresse Haugesund og restaurantdrift og cateringverksemd som vedtektsfesta føremål. Ömer Sariaslan er styreleiar i selskapet, som blei registrert i Brønnøysundregistra i 2021.
