Ingen mista førarkortet under tre timar lang kontroll i Førde

Utrykkingspolitiet hadde kontroll på E39 i Førde mellom klokka 10.00 og 13.15 måndag. Det blei skrive ut 15 forelegg, men var ikkje dei store fartsoverskridingane.

– Det ser ut til at føret bidrar til at folk køyrer litt meir forsiktig samanlikna med sommaren. 15 reaksjonar er likevel relativt mange. Høgaste fart blei målt til 74 km/t i 60-sona. Det gir eit forelegg på 5.560 kroner. I tillegg kjem to prikkar på førarkortet, seier politibetjent Idar Helland i UP.

– Kven er det som køyrer for fort?

– Ein god blanding av lokale og bilistar på gjennomfart, seier Helland.

79 sjåførar vart også kontrollert for rus. Ingen fekk utslag, og det er Helland veldig nøgd med.