nyhende
På plass i topp moderne brannstasjon
Vel eit år på lager er over, og den nye brannstasjonen i Sveio er no i full drift. Den topp moderne stasjonen i Leitevegen blir også brukt av kommunen sine avdelingar for veg, vatn og avløp (VA) samt uteavdelinga til kyrkja.
I august 2019 kom det pålegg om å utbetra den gamle brannstasjonen i høve til arbeidsplassforskrifta. Stasjonen stetta stort sett ingen av krava til Arbeidstilsynet lenger, og særleg gjaldt dette rein/skitten sone adskilt med dusjsone, ventilasjon og garderobeforhold.
Knappe to år seinare vedtok Sveio kommunestyre bygging av ny brannstasjon og bevilga 44,7 millionar kroner. Dette inkluderte solcellepanel på vognhalltaket til 700.000 kroner.
Midlertidig på lager
Omega Areal har vore arkitekt og ansvarleg søkar, og Engelsen Entreprenør AS har vore totalentreprenør. Om lag 20 ulike foretak har vore involvert i prosjektet.
Den gamle brannstasjonen måtte rivast, og i vel eit år har utstyr til brannmannskap vore plassert i eit lagerbygget på om lag 300 kvadratmeter som vart sett opp like ved. I den eine delen blei det montert opp garderobeskap og sett inn dusj- og wcvogn. I resten av lagerhallen fekk brannustyr og køyretøy plass. Bygget blir no tatt i bruk som lager for kyrkje,- veg,- og VA-avdelingane.
22. januar var det flytting frå lager til splitter ny og topp moderne brannstasjon. Alt som har med brannstasjonen å gjera var fullt operativt frå den datoen, slik at eventuelle utrykkingar kunne gå som normalt medan resten av bygget blei flytta inn i.
Bygd for framtida
Per Riise har vore prosjektleiar i Sveio kommune i fleire år og blir snart pensjonist. Han gler seg over å avslutta med brannstasjonprosjektet der det er mykje å vera stolt over.
– Her er det både bygd for framtida og lagt opp til godt sambruk med andre avdelingar i kommunen. I 2. etasje er det 12 kontorplassar. Nokre av dei faste til stasjonsmeister, uteavdelinga til kyrkja og kommunen sine veg- og VA-avdelingar. Dei andre blir nytta av administrasjonen, samt andre som har behov for kontor, fortel Riise.
Det er også kjøkken og eit stort og eit lite møterom i 2. etasje. Møteromma kan bookast av alle i kommunen, og då Vestavind var på rundtur hadde Sapio kurs i arbeid på og ved veg. Og ikkje minst er det eit stort treningsrom som også dei ved Førde brannstasjon kan bruka.
– Treningsrommet er veldig godt utrusta, og sidan me flytta inn har det vore folk og trent her kvar einaste dag. Det er veldig bra, seier stasjonsmeister John Anders Semb.
Stort løft for arbeidstilhøva og helse
Men først og fremst er den nye brannstasjonen i 1. etasje av bygge eit stort løft for arbeidstilhøva og helsa til brannmannskapa. Dei har fått ein av dei mest moderne brannstasjonene i Noreg som arbeidsplass.
Sveio brannvesen har 16 frivillige brannmannskap. Alle har andre jobbar til dagleg. Også stasjonsmeister Semb, som er arbeidsleiar drift og anlegg i Sveio kommune.
– For folk flest er det kanskje ikkje så lett å forstå dette med rein og skitten sone. For brannmannskapa er dette svært viktig, særleg i høve til kreftfare. Me blir utsett for mange ulike stoff når me er på oppdrag, og då er det svært viktig å minimere påverknadene mest mogeleg både ute på oppdrag og når me kjem tilbake til stasjonen. Røykdykkarane får til dømes ikkje setta seg i bilane med brukt utstyr. Alt blir tatt av og pakka i plastsekkar, og dei tar på seg reine klede, fortel Semb.
Stasjonsmeister John Andres Semb tok sporty utfordringa med å demonstrera korleis brannmannskapa rykker inn, kler seg og rykker ut. I litt saktare tempo enn vanleg for at redaktøren skulle henga med.
Frå rein til skitten sone
Når det er utrykking går, eller spring, brannmannskapa til garderoben der brannkleda heng i namna garderobeskap som har kraftig avsug. Dette er rein sone. Det er også vognhallen der dei tre brannbilane står klare.
Når mannskapa kjem tilbake går dei inn i bygget via skitten sone på baksida. Der blir brukte arbeidsklede, som ikkje skal til spesialvask i Haugesund, lagt i korger før mannskapa går i dusjen. Når det er unnagjort kan dei gå inn i garderoben igjen via ei anna dør.
– Det er ikkje berre klede som blir forureina, og alle bilane må reingjerast grundig innvendig og utvendig etter eit oppdrag. Den nye vaskehallen er topp moderne, og eit svært godt verktøy som me er veldig nøgde med, seier Semb.
I ein del av vaskehallen er det eit eige rom for reingjering av røykdykkarutstyr og påfylling av oksygenflasker.
– Fram til no har me sendt utstyr og gassflasker til Haugesund og fått påfyll av reint utstyr og fulle oksygenflasker i retur. No får me snart luftkompressor på plass og kan ordna påfyll av flaskene sjølv, seier Semb.
Barrierevaskeri
Vask av forurensa branntøy blir no utført av Haugesund brannvesen, men romfunksjonane mellom rein og skitten sone i bygget er utforma slik at ein på sikt kan vaska arbeidskleda sjølv. For løysa dette på eigen stasjon må det monterast inn ei barriærevaskemaskin, kjemikalieskap og tørkeskap.
I dag er det sett inn vaskemaskin og tørketommemel slik at ein kan vaska andre arbeidsklede som ikkje er forurensa etter brann. Etter vask blir desse kleda lagt gjennom ei dobbel luke og henta ut på rein sone.
– Me er forut vår tid, og har bygd opp rein og skitten sone også for VA-avdelinga. Dette er ikkje krav no, men vil ganske sikkert koma, seier Riise.
