Høgre gler seg over at Arbeiderpartiet har vore på bedriftsbesøk, og me oppmodar dei til å besøkje fleire. Det er smått utruleg å påstå at ein er på «jobb for næringslivet», samstundes som ein har auka skattane med 120 milliardar. Me gler oss òg over omsetnadsauken til Bømlo Skipsservice – det gjer dei ikkje fordi vi har Arbeiderpartiet i regjering, men fordi det er ein gjeng med særs dyktige folk som evner å produsere etterspurte produkt.

Likevel undrar det oss kvar Arbeiderpartiet har vore dei siste fire åra. I Sunnhordland har dei ikkje vore. Lakseskatten i 2023 førte til at milliardinvesteringar i våre kommunar vart utsette eller avlyste. Manglande tempo i havbruksmeldinga, og ingen innføring av miljøfleksibiltetsordninga har ført til konkursar i vår region, og at 100 tilsette på Bømlo like før jul mista jobben då ein avslutta produksjonen av den sterkaste merkevara i regionen; Salma-laksen.

Høgprisbidraget sette vertskommunane for kraft i limbo og kutta rammeoverføringane til Kvinnherad med over 100 millionar. Beskjeden kom berre ei veke etter at kommunebudsjettet var vedteke. Kommunar og næringsliv treng føreseielegheit og regjeringa med alle sine drastiske grep sidan 2021 bidreg ikkje til det.

Arbeiderpartiet peikar på at eksporten har auka. Ja, olje og gass blir eksportert i storskala, men dette skjer mot eit dystert bakteppe – krigen i Europa og utfasinga av russisk gass frå marknaden. Næringslivet er òg opptekne av føreseielegheit når det gjeld straumprisane. Arbeiderpartiet sin «Norgespris» tek ikkje omsyn til næringslivet, medan Høgre sin «Trygg pris» vil sikre føreseielegheit for både folk og bedrifter. Me i Høgre meiner det enkelt: Folk skal få att pengane sine for kunstig høge straumprisar. Staten skal ikkje tene seg søkkrik på å selje straum til folk og næringsliv.

Arbeidsløysa er låg, men dei demografiske tala er krystallklåre: Me blir fleire eldre og færre i arbeidsfør alder. Det er bra med låg arbeidsløyse, men det kjem med eit alvorleg bakteppe. Under Arbeiderpartiet si leiing har talet på menneske utanfor arbeidslivet nådd eit historisk høgt nivå. 700 000 personar i arbeidsfør alder deltek ikkje i det ordinære arbeidslivet eller er under utdanning. Og regjeringa gjer lite for å få dei inn skule og arbeid att.

Høgre meiner me ikkje skal sminke tala, men vere ærlege i møte med folk og næringsliv. Difor vil me:

• Senke skattane for både folk og næringsliv.
• Innføre «Trygg pris» for å gi folk føreseielegheit for straumprisane sine.
• Redusere helsekøane og sikre høg kvalitet i skulane.
• Ikkje gi opp unge som står utanfor arbeidsliv og skule, men gje dei ein veg tilbake.
• Satse på samferdsel langs kysten vår, Høgre er garantisten for at Hordfast realiserast etter at Ap har skapt stor usikkerheit om prosjektet.

Det er val til hausten, og det er opp til deg om du vil ha ei regjering som løftar folk og næringsliv her i vest.

Liv Kari Eskeland – stortingsrepresentant for Høgre

Lise-May Sæle – stortingskandidat for Høgre

Kåre Martin Kleppe – fylkestingsrepresentant og gruppeleiar i Tysnes Høgre

Vegard Bjørnevik – ordførar i Kvinnherad kommune (i farspermisjon)

Øyvind Kyvik – varaordførar i Stord kommune

Bente Kari Sletten Taranger – ordførar i Austevoll kommune

André Mundal Haukås – ordførar i Sveio kommune

Wenche Tislevoll – ordførar i Fitjar kommune

Ragnfrid Sønstabø – varaordførar i Bømlo kommune

Arild Stenberg – gruppeleiar i Etne Høgre