nyhende
Arne Valen til minne: «Eg har aldri tenkt at me skal døy utkvilte»
Livet tok ei brå vending, sa Arne Valen til Vestavind i desember. Då hadde det gått eit par månader sidan han fekk sjokkmeldinga om at han var alvorleg sjuk av kreft. Onsdag døydde den samfunnsengasjerte og sosiale lokalpolitikaren og familiemannen. Han ville fylt 70 år 20. mai.
Arne Valen blei fødd på Åse i Sveio som den eldste av fire søsken. Seinare budde familien fleire stader i Sveio før dei flytta til Haugesund, der borna hadde mesteparten av oppveksten sin. Foreldra var engasjert i Misjonskirken, og Arne kom tidleg med i kyrkjelyden sitt ungdomsarbeid.
Her møtte han også Elisabeth, som han gifta seg med. Då Nordre misjonsmenighet blei etablert på Bleikemyr på slutten av 1970-talet, var han leiar i byggekomiteen og seinare også leiar i styret for kyrkjelyden. Han dirigerte også ungdomskoret Eternity.
Kirkens Bymisjon
Etter gymnaset utdanna Valen seg til bioingeniør, Han arbeidde i mange år ved laboratoriet på Haugesund sjukehus, den siste tida som leiar. Etter kvart blei han utfordra til å arbeida tettare på menneske som hadde det vanskeleg, anten i samband med rus eller andre utfordringar.
I 2005 fekk han sjansen til dette då han blei tilsett som leiar for Kirkens Bymisjon sitt nystarta arbeid på Haugalandet. Det var ein krevjande jobb som kravde heile tida hans. Under hans leiing vaks denne verksemda frå fem tilsette i 2005 til 24 tilsette og 350 frivillige då han gjekk av i 2019. Organisasjonen hadde då verksemder i Haugesund, Karmøy, Tysvær, Sveio, Stord og Odda.
Då han gjekk av med pensjon, sa Valen til Haugesunds Avis at han no ville prioritera familien og lokalpolitikken. Samstundes signaliserte han at han framleis var full av energi. Og han gjorde eit sitat av Anne Lindmo til sine eigne ord: «Eg har aldri tenkt at me skal døy utkvilte.»
Sveio Andelslandbruk
Elisabeth og Arne Valen budde først på Bleikemyr, men gjorde sveibuar av seg etter at dei hadde overtatt småbruket på Mækjeland i 2011. Besteforeldra hans på farssida kjøpte dette småbruket like etter andre verdskrigen. Foreldra hans hadde det også i ein periode før Arne og Elisabeth overtok.
På Mækjeland fekk han høve til dyrka jorda, halda høns, kaniner og sauer og driva med birøkt. Etter at han blei pensjonist, ønskte han å gjera meir ut av gardsdrifta. I løpet av «koronavåren» 2020 tok han initiativet til Sveio Andelslandbruk.
I samarbeid med Kristian Eilerås blei andelslandbruket etablert same haust. Det har blitt ein suksess og ein viktig møteplass mellom bønder og forbrukarar frå bygd og by. Trass i avgrensingane som sjukdommen sette, var Valen med og deltok i planlegginga av årets dyrkingssesong.
Stort hjarte for dei svake
Som det samfunnsengasjerte mennesket han var, gjekk også Valen inn i organisasjonslivet og politikken i Sveio. Han blei medlem av Sveio bonde- og småbrukarlag og i Senterpartiet sitt lokallag i kommunen. Han blei med i det lokale Sp-styret, og blei valt inn i kommunestyret første gong i 2019. I denne første perioden blei han også leiar i kontrollkomiteen.
Etter valet i 2023 blei Valen leiar i hovudutvalet for helse og omsorg og fekk ansvar for eit stort og omfattande arbeid som han hadde særleg hjarte for. Partifeller som arbeidde saman med han i lokalpolitikken, omtalar Valen som engasjert, med stort hjarte for dei svake i samfunnet.
Han var også ein ivrig og dyktig debattant som aldri var redd for å stå opp for partiet og saker han brann for. Arbeidskapasiteten hans var stor, men veremåten lun. Dessutan blir han omtalt som inkluderande og alltid i godt humør, same kor han var. Sjølv etter at han blei sjuk var han optimistisk, trass i at han var klar over alvoret i situasjonen.
Aktiv til det siste
Valen var blant dei representantane som brukte taleretten sin i dei fleste, om ikkje alle, kommunestyremøta han var med på. Slik var det også 30. september i fjor, sjølv om han etterpå fortalte at han var i svært dårleg form denne måndagskvelden.
Berre eit par dagar seinare kontakta han fastlegen sin og blei sendt til undersøkingar som innan kort tid avslørte den alvorlege kreftsjukdommen. Etter dette søkte Valen permisjon frå alle dei politiske verva sine. Han var likevel engasjert til det siste og kom med innspel til styret mellom anna i samband med lokallaget sitt årsmøte.
Etter at han blei sjuk, var Valen sitt store mål å få leva lenge nok til å fleira 70-årsdagen med ein stor hagefest og konsert heime på Mækjeland, der ei rekke kjente artistar er booka og inntektene skulle gå til Kreftforeningen. Så langt kom han ikkje.
Arne Valen etterlet seg kona Elisabeth, tre døtre og åtte barnebarn.
