Økland-arkivet overlevert til Sveio

Samstundes presenterte Ottar Grepstad boka «Økland-arkivet».

Overleveringa av det digitaliserte Økland-arkivet skjedde måndag under ei samkome på Sveio folkebibliotek. Samstundes presenterte forfattaren og forlagsmannen Ottar Grepstad boka «Økland-arkivet».

– Det tok 60 år å skriva breva og manuskripta som Einar Økland har samla i sitt arkiv. Det tok fire månadsverk å ordna og digitalisera alt saman og sju sekundar å overføra det digitale arkivet til ein ekstern harddisk, sa Grepstad under presentasjonen.

Nær 10.000 sider

Det er han som har stått for arbeidet med å ordna og digitalisera dokumenta, som til saman utgjer 9.552 sider fordelte på 614 filer. Dokumenta representerer norsk skriftkultur mellom 1959 og 2019. Prosjektet er gjennomført i samarbeid med Sveio folkebibliotek og med støtte frå private sponsorar, Kulturrådet og eigeninnsats. Kulturrådet var prepresentert ved leiar Sigmund Løvåsen under overleveringa.

– Private arkiv som dette er svært viktige for å få eit fullstendig bilde av kven me er og har vore. Det er difor svært viktig å ta vare på desse. Sveio kommune har fått ein kulturskatt av både lokal, nasjonal og kanskje til og med internasjonal verdi, sa Løvåsen under overleveringa.

Til Vestavind seier Løvåsen seg svært glad for at Sveio folkebibliotek vil ta ansvaret for samlinga. Ikkje så sjeldan blir slike arkiv gøymde bort og gjort og gjort utilgjengelege for publikum, seier han.

Under besøket i Sveio var Løvåsen også innom Valen-heimen for å gjera seg betre kjent med arbeidet der.

– Ei ære for kommunen

Ordførar André Mundal Haukås helsa dei innbedne gjestene velkommen til overleveringa. Både han og biblioteksjef Kristine Thorkildsen seier det er ei stor ære for kommunen å få forvalta det omfattande materialet som forfattaren Einar Økland på denne måten gir frå seg til nye generasjonar.

Forfattaren sjølv tok ovasjonane og takketalane med stor ro.

– Etter mitt syn er vanlege kvardagar det aller beste. Men eg kunne vore med på noko verre enn dette, seier han på sitt underfundige vis.

Økland medverka elles med å lesa eitt av dikta sine for dei frammøtte, sjå video.

Thorkildsen seier at materialet vil bli gjort tilgjengeleg for interesserte etter gjeldande reglar. I nokre tilfelle kan interesserte få kopi, i andre tilfelle må dei møta fram på bibliotektet og få tilgang til materialet der. Ein del av dei digitaliserte dokumenta vil framleis vera unnateke offentleg innsyn av personvernomsyn.

Ottar Grepstad, som har stått for digitaliseringa av Økland sitt dokumentarkiv, har også skrive det han kallar ein biografi av Økland-arkivet, ei bok med tittelen «Økland -arkivet».

«Biografi» av eit arkiv

– Dette er ei litteraturhistorie som rommar både diktnig, presse, bokhistorie politikk og nynorsk skriftkultur, seier Grepstad.

Boka er gitt i eit mindre opplag på hans eige forlag Grepstad Skriveri. Dei første eksemplarane blei delte ut til Økland, Sveio kommune og Kulturrådet under samlinga på biblioteket. «Økland-arkivet» kjem ikkje til sals hos bokhandlarane, men vil bli distribuert til eit uval bibliotek, forklarar Grepstad.

Saman med Sverre Tusvik var Grepstad redaktør for boka «Økland» med undertittelen «Einar Øklands livsverk i samling» som blei gitt ut på Fonna Forlag i fjor. Under arbeidet med boka gjennomførte dei to redakatørane saman med Agnes Ravatn og Jorunn Veiteberg omfattande samtalar med Einar Økland i Valevåg. Desse samtalane blei tatt opp på video. Til saman er det snakk om 30 timar med opptak. Det er også gjort utskrifter av alle samtalane. Under samlinga på Sveio folkebibliotek måndag overraska Grepstad med å overrekka opptaka og utskriftene av alle Valevåg-samtalane til Sveio kommune.

– Det skal bli tatt godt vare på, forsikrar Thorkildsen.