Ny E39 kan krevja riving av 19 hus

Dette får Vestavind opplyst i samband med at Statens vegvesen tysdag heldt folkemøte om planleggingsprosessen for den nye motorvegen i Vigdartun. Alle som kan risikera å få husa sine innløyste, har alt fått orientering om dette, får me vita.

Onsdag blir det tilsvarande møte i Tysvær, og onsdag i Bokn. Forslaget til kommunedelplan for strekninga Bokn-Bømlafjorden skal etter planen leggjast fram 9. februar neste år.

For folket langs vegen

– Denne gongen skal det handla mest om folka langs vegen som blir berørte av planane, ikkje om klima og miljø, sa planleggingsleiar Henry Damman ved starten av møtet i Vigdartun.

Han brukte deretter god tid til å forklara behovet for firefelts motorveg på den godt og vel 60 kilometer lange strekninga.

– Vegen skal bli tryggare, raskare og meir framtidsretta sa han mellom anna, og viste til at trafikken mellom Stavanger og Bergen vil bli tredobla fram mot 2060 i forhold til i dag.

E39 mellom Bokn og Bømlafjorden har alt i dag 60 prosent fleire ulukker med personskade i forhold til landsgjennomsnittet for riksvegar. Mellom Bokn og Bømlafjorden er det i dag 250 kryss. Dette talet skal ned til om lag seks. Strekninga er elles ein del av planen om ferjefri veg mellom dei to største vestlandsbyane. Fullt utbygt er målet å korta ned reisetida mellom Stavanger og Bergen frå fire og ein halv til litt under to timar.

To alternative traséar

Vegvesenet har enno ikkje konkludert med kva trasé dei vil gå inn for når forslaget til kommunedelplan skal leggjast fram. Planarbeidet har vore konsentrert om to korridorar på heile strekninga. Begge alternativa blei presenterte av fagansvarleg Eivind Kvarekål på informasjonsmøtet, frå sør til nord. Alternativ ein er det austlegaste og ligg nærast Fjon i sør. Vidare følgjer det dagens E39 eit godt stykke. Ved Krossgått er det lagt inn eit stort toplankryss med rundkjøringar på begge sider. Utanom dette er det berre lagt inn av- og påkøyring ved Bømlafjordtunnelen i dette alternativet.

Alternativ 1 held fram over Nese der det går tett inn på eit gardsbruk, og vidare nordover på austsida av Lierfjellet og ovanfor busetnadene på Lier. Alternativet går også i høgda og aust for Førdebygda. Bak kyrkja er det lagt inn ein kort tunnel.

Lenger nord er det også lagt inn ein kort tunnel ved Middagshaugen i Valestrand. Dette alternativet, slik det ligg føre i dag, vil krevja innløysing og riving av sju bustader og hytter.

Alternativ 2 ligg lenger vest på den sørlegaste delen av strekninga gjennom Sveio. Etter eit toplankryss nærare Haukås held vegen fram mot Rødspollen. Det blir ei høg fylling bak Rød bedehus. Vidare går vegen på vestsida av Lierfjellet og like bak og ovanfor bustadhusa og industrifeltet på Hanaleite.

Vegen fylgjer dagens E39 gjennom Førde og deler dermed bygda i to. Vidare er det i dette alternativet lagt inn eit stort toplankryss i Førde. Vidare nordover går vegen lengst vest og utan tunnelar. Dermed kjem han også tett på bustadfeltet på Middagshaugen. I tillegg til at alternativ 2 krev riving av 19 hus og hytter, er dette alternativet litt lengre og litt dyrare enn alternativ 1, får Vestavind opplyst.

Mest opptekne av Førde

Mange av dei godt og vel 200 frammøtte i Vigdartun nytta høvet til å stilla spørsmål. Dei fleste spørsmåla gjaldt trasévalet gjennom Førde.

– Førde bygdalag har sendt inn forslag om å leggja vegen i lang tunnel utanom Førde-bygda. Kvifor kan de byggja lange tunnelar både i Ålgård og inn mot Bergen, men ikkje her? ville Thomas Førde vita.

Fleire kom med tilsvarande spørsmål, ein av spørsmålsstillarane sette forslaget om tunnel i Førde opp mot tunnelarmen til Kvitsøy som ein del av Rogfast. I svaret sitt viste Damman til bestillinga vegvesenet har fått og som går ut på at dei skal unngå tunnelar så langt dette er mogleg. Så langt er ny E39 frå Bokn til Bømlafjorden kostnadsrekna til 20-25 milliardar kronar. Lang tunnel utanom Førde vil fordyra prosjektet med tre-fire milliardar, hevda planleggingsleiaren.

Det blei også stilt spørsmål om trafikkulempene på dei strekningane der den nye vegen er planlagt å fylgja dagens E39 og der lokaltrafikken såleis misser eit lokalt alternativ.

– Dette må det finnast løysingar på, slo Damman fast.

Etter at forslaget til kommunedelplan blir lagt fram i februar neste år, skal planen først ut på høyring. Deretter skal han til behandling i kommunane, og Damman håpar det vil skje innan 2026. Når kommunedelplanen er vedtatt i alle dei tre kommunane, kan reguleringsarbeidet starta, men først etter at vegvesenet har fått ei ny bestilling. Sjølve reguleringsarbeidet er venta å ta to-tre år. Først når reguleringsplanen er godkjent har berørte grunneigarar krav på å få erstatning, for eksempel ved innløysing av hus.

Frustrerande ventetid

– Eg forstår at den lange ventetida er frustrerande for folk. Me må jobba for at den tida blir kortast mogleg, seier ordførar André Mundal Haukås. Han deltok på møtet, og seier til Vestavind at han reknar med at Sveio skal klara å gjera seg ferdig med kommunedelplanen i løpet av 2026.

Kva alternativ han vil gå inn for, for eksempel i Førde, vil han ikkje gå ut med. Samla sett meiner sveioordføraren at den planlagde firefeltsvegen vil representera interessante moglegheiter for kommunen.