Skuleelev blant dei smitta – tre nye fredag

Dei nye tilfella har folkeregistrerte adresser i Sveio, men nokre av dei bur i andre kommunar, slik at smittesporingsarbeidet vil halda fram i dei aktuelle kommunane.

– Smittesporingsarbeidet er det viktigaste arbeidet som blir gjort no, testsenteret jobbar med det. Me i kriseleiinga i Sveio kommune har jamlege møte, etter kvart som nye opplysningar kjem, og me vurderer om me skal gjera andre vedtak og avgjerder. Akkurat no er det Førde skule som er berørt, og har hovudfokus, seier ordførar Linn Therese Erve til Vestavind.

Andre med symptom

Éin elev i 7. klasse har fått påvist smitte, klassen er derfor i karantene inntil vidare. Nokre av elevane som er nærkontaktar, hadde også symptom før dei blei testa.

Nokon har stilt spørsmålsteikn ved å stenga heile skulen frå onsdag, spesielt med tanke på at 1.-4. klasse og 5.-7. klasse er to kohortar.

– På grunn av lærarressursar såg me det som nødvendig å stenga heile skulen. Det er viktig å presisera at me ikkje stenger skular med mindre det er nødvendig for å avverga smitte. Me stenger ikkje for å vera føre-var, me har strenge vurderingar, og gjer alt me kan for å ha skulane opne. I dette tilfellet var det for uoversiktlig å halda ope, forklarar Erve.

Når det gjeld Førde skule i neste veke, vil situasjonen bli vurdert i helga.

Digitale møte

I tillegg til ordføraren, er det rådmann Jostein Førre, dei tre kommunalsjefane Ingunn Toft, Elisabeth Nygaard og Kenneth Tollefsen, og økonomisjef Peter O. Lura som sit i kriseleiinga.

– Me har møter på Teams, då tilsette på kommunehuset er oppmoda til å ha heimekontor. Flesteparten av oss i kriseleiinga jobbar heimefrå, meg sjølv inkludert, seier Erve.

– Eg vil oppfordra alle til å forholda seg til smittevernreglane som gjeld – det er viktig å halda seg heime, vaska hendene og kontakta testsenteret om ein har symptom, påpeikar ordføraren.