nyhende
Grabben i jorda for nytt aktivitetshus
Tysdag denne veka kunne endeleg ordførar Linn Therese Erve markera byggestart av nytt aktivitetshus for funksjonshemma. Bygget skal stå ferdig i midten av mai 2022.
Sprenging av tomta, samt sikring av skjering med meir er ferdig. Arbeidet er utført av Engevik & Tislevoll AS frå Stord.
Ansvar for arbeidsprosessen vidare er det Steinsbø Hus AS som står for. Av totalt fem verksemder som gav tilbod i den opne tilbodskonkurransen var det Bømlo-verksemda som hadde lågast pris – tett opp mot 14 millionar kroner for det nye aktivitetshuset.
Ifølgje byggeleiar Johannes Markhus i Steinsbø Hus AS, har verksemda erfaring med liknande bygg, både frå eigen kommune Bømlo, og frå Stord.
– Me har tru på at dette blir eit flott prosjekt, me gler oss til å starta arbeidet, seier Markhus.
Etterlengta tilbod
Å ha eit aktivitetshus, slik at også gruppa med nedsett funksjonsevne kan ha eit aktivt liv og kvardag i lag med andre i Sveio, har vore etterlengta i ei årrekke. Kommunen kjøpte tidlegare det såkalla Lothe-bygget til arbeidshus (kjøpssum 1.950.000 kroner), men i ettertid viste det seg å bli meir kostbart og lite hensiktsmessig å setja i stand enn det som var førespegla. Dermed blei desse planane forkasta. I staden blei nabotomta kjøpt til formålet.
– Det har blitt eit relativt kostbart prosjekt, men med husbankfinansiering har me klart å berga prosjektet. Det skal også seiast at det har vore stor politisk velvilje frå a til å gjennom heile perioden, opplyser Tore Johann Enerstvedt, drift og anlegg i Sveio kommune. Bygget er no også dimensjonert for framtidig auke i brukarar.
Allsidig og funksjonelt
Det er lagt ned mykje godt planleggingsarbeid, som har resultert i eit allsidig og funksjonelt bygg, både for dei menneska med funksjonshemming som skal ha sine aktivitetar der, og for personalet.
Brukarane har ikkje tidlegare hatt eit slikt hus i Sveio. Nybygget får blant anna verkstadhall, fleire grupperom, trimrom, sanserom, kontor og pauserom, og er planlagd for opp til 15 brukarar. I tillegg skal det opparbeidast eit flott uteområde som skal innby til aktivitet utandørs.
Betyr mykje for mange
– Me ser fram til å ta i bruk aktivitetshuset, det vil gjera kvardagen betre både for brukarane, pårørande og tilsette, påpeikar einingsleiar habilitering, Evy Vihovde Kjellevold.
Kjellevold har vore med i ei eiga arbeidsgruppe som har sett på planteikningar saman med ei referansegruppe beståande av pårørande representantar, politisk, råd for funksjonshemma, verneombod og tillitsvalde. Gruppa har fått gode innspel frå mange hald, og har også vore på befaring i Sauda og sett på tilsvarande bygg.
