Kommunevalet i år vil bli svært spanande. Heile 11 lister stiller til val, og dei er fullspekka med mange dyktige kandidatar. Tverrpolitiske Fellesliste er ei av listene som er klare til å utfordre dei etablerte. Alle parti er einige om å satse på unge og eldre, meir næringsutvikling og betre vegar.
Nedanfor ynskjer me å vise til nokon konkrete prosjekt me vil gjennomføre, for at Sveio skal bli kjent som ein handlekraftig kommune. Ein kommune som får til noko i saman der gode prosessar og prosjekt er tufta på eit tverrpolitisk samarbeid til det beste for fellesskapet.
Sveio sentrum:
- Fullføre prosjekt som allereie ligg inne i økonomiplan for 2023 – 2026 som ny symjehall, ny idrettshall og ny kommunal barnehage.
- Samarbeid med ungdomsrådet om å byggje frisbeegolfbane i kommunen.
- I tillegg vil me arbeide tett opp mot Vestland fylke og Statens vegvesen for å byggje sykkelveg mellom nordre og søre Tveitvegen og mellom Vågedalen om Ekrene slik at alle kan sykle trygt mellom Sveio sentrum og Ekrene.
- Dei eldre skal vite at me vil be rådmannen om ei sak på å investere i eit eldretur som skal innehalde ei trygg demensavdeling.
Førde:
- Me skal sikre ei vegløysing for Solheimslio og Lauvneset, og vere med på ei rehabilitering av den gamle «kommunekaien» som er eigd av Karmsund havnevesen.
- Me skal passe på at det blir bygd sykkel / gangsti / eventuell tursti mellom Rød og Førde over Drange. Det er i tillegg viktig å få på plass ei løysing med el – bil lading ved avkøyringa til Førde sentrum.
- Rex Garden er eitt av dei flottaste turområda i kommunen, og Tverrpolitisk Fellesliste vil sikre ein trygg og god tursti på stranda og effektiv tilkomst til dette området for vedlikehald.
Lid:
- Me vil samarbeide med Lid Grendelag om vedlikehald av gamle Lid skule, for å ta vare på bygningsmassen.
- Halde fram med å løyve pengar til nærmiljøanlegg og sosiale møteplassar i krinsen.
Bua:
- Syte for at planarbeidet i Sveio kommune blir gjennomført slik at ny Tjernagelsveg skal bli realisert.
- Støtte opp om Liv og Lyst-prosjektet på Bua.
Auklandshamn:
- Vere med på å finansiere nærmiljøanlegg og sosiale møteplassar i krinsen.
- Sikre nok areal til bustadbygging gjennom planarbeidet og trafikksikringstiltak for trygg skuleveg.
Vikse:
- Halde fullt trykk på planarbeidet med ny veg mellom Rophus og Vikse skule.
- Byggje sykkelveg frå den nye Rophusvegen til Vikse skule.
Valestrand:
- Støtte opp om kulturlivet i Valestrand.
- Vere med på å finansiere naudsynt vedlikehald av Valestrand oppvekstsenter slik at det skal vere ein godt fysisk miljø for barn og unge både i skuletida og på kveldstid.
Godt val!
Asle G. Halleraker,
ordførarkandidat Tverrpolitisk Fellesliste Sveio