I nydeleg sommarvær med sol og skyfri himmel møtte over 100 store og små opp til ein aktivitetsdag ved dette flotte friluftsområdet nede ved sjøen heilt ytterst i Ålfjorden. Nokre av dei frammøtte prøvde fiskelukka, mens andre fanga krabbar eller hjelpte sine barn eller barnebarn.
Det blei servert gratis pølser, brus og kaffi, noko det blei stor avsetting på. Alle barn fekk fiskehåvar, capsar, fiskehattar og buff. Det var til tider kø for å padle i foreininga sine sit-on-top kajakkar og kanoane me hadde fått låne frå Valestrand idrettslag.
Ein rådyrbukk forvilla seg også ned til Holsvika under arrangementet, og både barn og vaksne fekk dermed eit sjeldan møte med dette flotte dyret.
Ungane storkoste seg med bading, fisking, kanopadling og krabbefangst, og me fekk mykje skryt og positive tilbakemeldingar frå dei som møtte opp.
Mot slutten av arrangementet blei alt av fangst både talt, målt og vegd etter beste evne. Det ble ein imponerande fangst, og det blei faktisk fanga over 200 krabbar.
Fangstane bestod av både makrell, lyr, strandkrabbar, svømmekrabbar, strandreker, eremittkreps, grønngylt, kutlingar, ulke, stillehavsøsters, blåmanet, strandlopper, sandskjell, kuskjell, o-skjell og knivskjell.
Under premieutdelinga blei det delt ut mange fine premiar til stolte fiskarar. Dei som støtta oss med gåver denne gongen var Vikse Paintball, Kiwi Sveio, Egon, Haukås Bilverksted og Norges Jeger- og Fiskerforbund.
Tusen takk til dei som sponsa og alle dei som deltok på dette arrangementet, og som gjorde dette til ein fantastisk dag for små og store.
Vidar Høyland, leiar
Sveio Jakt-, Fiske- og Naturvernforening (SJFNF)