Onsdag 15. oktober 1873 blei Valestrand kyrkje innvia av biskop Birkeland. Ja, det var på ein onsdag. Det var fleire kvite trekyrkjer som blei sett opp i løpet av 1870-åra i Bjørgvin bispedøme. Det kan spørjast om den gode Birkeland hadde kjent seg igjen hadde han dukka opp på jubileumsdagane 18. til 22. oktober 2023.

Kyrkja er blitt ny både utvendig og innvendig sidan den gong, og møteformene er nok også forandra på 150 år. I jubileumsveka var det skipa til både kulturkveld, konsert og festgudsteneste samt festmiddag på Ørevik grendahus.

Kulturkvelden

«Ei soge om endringar» er namnet på den nye boka skriven av Gunnar Salamonsen og redigert av Arild Steinsland. Og kulturkvelden i jubileumsveka var sett av til å fortelje utdrag frå kyrkjas 150-årige historie – levandegjort av forfattar Gunnar Salomonsen. Hans gode historieformidling samansett med refleksjonar over historia, var noko forsamlinga sette stor pris på.

Einar Økland framførte delar av sin nyskrivne «prolog med postlog-røyster». Resten fekk dei høyre som kom på festmiddagen på Ørevik om søndagen. I start og ved slutt i programmet fekk me høyre Alie Hamberg på orgel og flygel framføre både Bach og Fartein Valen. To komponistar som har prega mykje av musikkbiletet i Valestrand kyrkje gjennom alle 150 åra, og kanskje spesielt dei siste 19 åra då kyrkja også har vore kulturkyrkje. Dagen blei avslutta med, som vanleg i kyrkja, kulturkyrkjekaffi.

Konsert og trippeljubileum

På fredag den 20. oktober var det duka for konsert med kora Valestrand Mannskor og Ad Libitum, samt solistane Preston James Kingsley, som er dirigent for Valestrand Mannskor, og Sølvi Irene Vinnes som er knytt til Valestrand gjennom Valen-heimen. Det var ein flott konsert med variert program framføre ei fullsett kyrkje.

Ekstra kjekt var det at ein i 150-årsjubilanten Valestrand også kunne markere at Valestrand Mannskor er 10 år i år og at Ad Libitum er 40 år i år. På laurdagen hadde Ad Libitum si eiga jubileumsfest. I kyrkja var det også fest med kake etter konserten.

Festgudsteneste

Søndag 22. oktober stod sjølve festgudstenesta på programmet. Dagens prest i Valestrand kyrkje, Arild Steinsland, tidlegare prest Gunnar Salomonsen og prost Svein Arne Theodorsen var med.

Klokkar var Else Mønnich Egenberg og ordførar André Mundal Haukås deltok som tekstlesar. Ved orgelet satt organist Alie Hamberg og med seg på fiolin var Karl Otto Mikkelsen. Det var ei fin gudsteneste som både hadde med det historiske lyset samt det aktuelle med å vere kyrkje i dag.

Festmiddag på Ørevik

Og for å avslutte det heile var det festmiddag på Ørevik med laks og plommegraut ved varaordførar og medlem i jubileumsnemnda Ruth Østebøvik Eriksen. Talar ved prost Theodosen og ordførar Haukås, og opplesing frå Einar Økland.

Ordføraren hugsa tilbake på konfirmanttida der han nemnte dei gode kunnskapar og verdiar han hadde fått med seg der som var viktige for han i livet i dag. Han nemnte også at vi neste år skal feire 1000-årsjubileet for kristenretten på Moster, der vi fekk dei første kristne lovene i vårt land. Dei er viktige for dei verdiane og det demokratiet vi har i dag, fortsette ordførar Haukås.

Til slutt blei komiteen for jubileet takka for godt og viktig arbeid, og sjølve jubileumsfeiringa runda av.

Arild Steinsland,
sokneprest og medlem i jubileumskomiteen