Vêrgudane spelte på lag, så det blei ein flott familiedag i strålande sol. Det var god mat, både thaigryte og pølser, og det var berre smular igjen av den store kaka.
Mange aktivitetar
Det var aktivitetar for borna, mellom anna biletrebus og hesteriding. Og det var lang kø for å få ri på dei to fjordingane som tolmodig gjekk rundt med ungar på ryggen.
For dei vaksne var det quiz, og dei fekk også nokre spørsmål både om kva som er godt med å bu i Auklandshamn, kva dei sakna og kva dei kan bidra med.
Innbyggjarane og samhaldet
Svara var mange, og dagens konferansier, Cato Thorsen, las opp nokre av svara. Det kom fram at det er mykje positivt med å bu i Auklandshamn, nærleik til sjø, fin natur, skule og aller viktigast: innbyggjarane og samhaldet.
Det mange saknar er butikken, og mange saknar fleire sosiale møtestader, spesielt for ungdommen, men og for andre aldersgrupper. Det kom også andre innspel, mellom anna badstu, volleyballbane, padelbane, gatelys og meir.
Nytt arrangement planlagt
På kva ein sjølv kan bidra med, var det mange som svarte at dei kunne stille på dugnad, at ein kunne vera aktiv i lag og organisasjonar og å framsnakka bygda.
No skal komiteen sjå på alle innspel før me fortset, men det er allereie planlagt eit LivOGLyst-arrangment for born søndag 26. mai. Meir info kjem.
Arbeidsgruppa for LivOGLyst i Auklandshamn
Solfrid Hjortland Kinn, Frode Stølås, Leif Eivind Bjelland og Gerd Jorunn Christensen